2015 წელს განათლებისა და მეცნიერების სამინისტრომ ახალი საგნის „მე და საზოგადოების" შესახებ პირველად ისაუბრა და საგნის შეტანა სკოლაში 2017-2018 წლისთვის დააანონსა. თუმცა მალევე საგანმა საპატრიარქოს განათლების ცენტრის, მართლმადიდებელ მშობელთა კავშირის აღშფოთება გამოიწვია.
მალევე გავრცელდა დეზინფორმაციები საგნის პროგრამასთან დაკავშირებით, თითქოს, აღნიშნული საგანი „ჰომოსექსუალობის პროპაგანდას" ეწეოდა.

საქართველო და მსოფლიო, 19 ივლისი, დიმიტრი ლორთქიფანიძე, პრიმაკოვის სახელობის ქართულ-რუსული საზოგადოებრივი ცენტრი: "რომ ნახოთ, რა სახის რეკომენდაციებს შეიცავდა ეს პროექტი [საგანი "მე და საზოგადოება"], შეიძლება არ დაიჯეროთ _ იქ იყო ისეთი ტიპის თამაშები, რომლებიც 7-დან 13 წლამდე ბავშვებისთვის იყო გათვალისწინებული და მასში პირდაპირ ერთ–ერთ პრიორიტეტს წარმოადგენდა მოზარდების "ცნობიერების ამაღლება" არატრადიციულ სექსუალურ ორიენტაციაზე. მაგალითად, ბავშვს უნდა წარმოედგინა, რომ წითელქუდა არის ვაჟი გოგონას ტანისამოსში, რომელიც საკუთარი სექსუალური იდენტობით განსხვავებულია, და ეს თურმე სრულიად ნორმალურია. მოსწავლეებს ასევე მონაწილეობა უნდა მიეღოთ სასწავლო პროგრამით გათვალისწინებულ გარკვეულ თამაშებში და თითოეულ მათგანს უნდა განესახიერებინა ესა თუ ის პერსონაჟი: ბიჭებს უნდა შეესრულებინათ გოგონების როლი _ ჩაეცვათ მათი ტანსაცმელი და ა.შ. აქ საუბარია იმაზე, რომ ე.წ. მესამე სქესის არსებობა, როგორც მოცემულობა, უნდა ყოფილიყო ბავშვებამდე დაყვანილი".